Kurdî News Agency

Wezareta Karên Derve û Diasporayê ya Filistînê biryara Dewletên Yekbûyî yên Amerîkayê (DYA) ya dirêjkirina sînordariyên vîzeyê li dijî karbidestên Rêveberiya Filistînê û endamên Rêxistina Rizgariya Filistînê (PLO) red kir.

Di daxuyaniya wezaretê de hat îdiakirin ku van tedbîran “neadilane” ne û bandoreke neyînî li ser hewldanên ji bo ji nû ve avakirina baweriyê, xurtkirina têkiliyên Filistîn-DYA û pêşxistina çareseriya du dewletan dikin.

Di daxuyaniyê de girêdana PLO û Rêveberiya Filistînê bi aştiyê, hiqûqa navneteweyî, biryarên Neteweyên Yekbûyî (NY) û çareseriya du dewletan a li ser bingeha sînorên 4ê Hezîrana 1967an ji nû ve hate piştrastkirin.

Wezareta Karên Derve û Diasporayê ya Filistînê nirxandina ku lêgerîna mafên Filistîniyan bi rêya NY û dadgehên navneteweyî hewldanên aştiyê lawaz dike red kir.

Di daxuyaniyê de hate gotin ku serlêdana hiqûqa navneteweyî û saziyên navneteweyî rêyek rewa û aştiyane ye ji bo parastina mafên Filistîniyan.

Di daxuyaniyê de hate gotin ku naskirina Dewleta Filistînê di qada navneteweyî de ne alternatîfa danûstandinan e, lê belê naskirina mafê gelê Filistînê yê diyarkirina çarenûsa xwe û avakirina dewletê ye.

Wezaretê herwiha bal kişand ser reformên berfireh ên ku li gorî wê ji aliyê hikûmeta Filistînê ve hatine kirin û bang kir ku ev xebat li ser bingeha daneyên konkret û pêşketinên ku dikarin bên piştrastkirin bên nirxandin.

Rêveberiya Filistînê ji rêveberiya DYA xwest ku van sînordariyan rake, bikeve diyalogeke rasterast û ciddî û li gorî biryarên NY û Daxuyaniya New Yorkê piştgirî bide hewldanên aştiyeke adil û domdar a li ser bingeha çareseriya du dewletan.

Di daxuyaniyê de hate gotin ku Dewleta Filistînê dê berdewam bike erkên xwe yên neteweyî û navneteweyî bi cih bîne û mafên xwe yên rewa bi rêyên siyasî, dîplomatîk û hiqûqî bişopîne.