Kurdî News Agency

Nûnera Bilind a Yekîtiya Ewropayê ji bo Karên Derve û Siyaseta Ewlehiyê Kaja Kallas derbarê agirbestê û pêvajoya aştiyê li Gazayê nirxandin kir.

Kallas di daxuyaniya xwe ya li ser medyaya civakî de got ku ger plana bêçekdarkirina Hamasê li Gazayê bi tevahî were pêkanîn, ev dikare ji bo aştiyê gaveke avaker be.

Kallas bi dilxweşî pêşwaziya peymana ku bi navbeynkariya Dewletên Yekbûyî û bi piştgiriya Misir, Qeter, Tirkiye û Nikolay Mladenov hatibû bidestxistin kir û tekez kir ku ji bo serkeftina pêvajoyê divê gelek şert bên bicihanîn.

Kallas got: “Serkeftin bi pabendbûna tam a hemû aliyan ve girêdayî ye. Piştrastkirina ku Hamas erkên xwe bi cih tîne dê zehmetiyeke girîng be.”

Kallas diyar kir ku di pêvajoyê de divê Îsraîl ji Gazayê vekişe û Yekîtiya Ewropayê amade ye ku piştgiriyê bide gavên paşîn.

Kallas got ku ketina Komîteya Neteweyî û Hêza Navneteweyî ya Aramiyê li Gazayê jî di nav gavên ku dê bên piştgirîkirin de ye.

Kallas destnîşan kir ku du mîsyonên Yekîtiya Ewropayê yên li qadê di piştgirîkirina hewldanên avakirina dewleta Filistînê de roleke girîng dilîzin û got ku Yekîtiya Ewropayê mezintirîn bexşkarê alîkariya mirovî ji bo Gazayê ye.

Kallas herwiha ragihand ku Yekîtiya Ewropayê di Tîrmehê de ji bo alîkariya vejandina Gazayê ya piştî şer, soz da ku 900 milyon avro ji bo projeyên alîkariyê veqetîne.