Kurdî News Agency

Ajansa Alîkarî û Karên Giştî ya Neteweyên Yekbûyî ji bo Penaberên Filistînî (UNRWA) ragihand ku ji ber pevçûnên ku zêdetirî du salan e li Gazayê didomin, zarok hewcedarê cihên ewle yên fêrbûn û lîstinê ne.

Li gor daxuyaniya UNRWA, di çarçoveya Bernameya Çalakiyên Havînê ya 2026an de, li seranserê Gazayê nêzî 60 hezar zarok li 78 Cihên Demkî yên Fêrbûnê beşdarî çalakiyên perwerdeyî, şahî û piştgiriya derûnî-civakî dibin.

Di nav zarokên beşdarî bernameyê de nêzî 1.000 zarokên seqet jî hene. Bi piştgiriya mamoste û şêwirmendên UNRWA, di çalakiyan de ji bilî fêrbûnê, ji zarokan re derfet tê dayîn ku bilîzin, dîsa bi hevalên xwe re têkiliyê daynin û piştgiriya derûnî-civakî bistînin.

UNRWA bal kişand ser şert û mercên giran ên ku pevçûnan di jiyana zarokan de afirandine û tekez kir ku cihên ewle ji bo pêşketin û pêvajoya başbûna zarokan girîng in.

Ajansê ragihand ku ji bo zarok dîsa civakî bibin û xwe ewle hîs bikin, çalakiyên perwerde, lîstin û piştgiriya derûnî-civakî didomin û peyama “Ji ber ku zaroktî nikare li bendê bimîne” parve kir.