Kurdî News Agency

Wezîrê Derve yê Yewnanistanê Giorgos Gerapetritis, berî civîna Encumena Karûbarên Derve ya Yekîtiya Ewropayê li Brukselê ji çapemeniyan re daxuyanî kir. Gerapetritis diyar kir ku pêşveçûnên li Gazayê, Ukraynayê û Balkanên Rojava li ser rojevê ne û got ku Yewnanistan bi taybetî di hewildanên ji bo aştiya Rojhilata Navîn de rolek çalak digire.

Gerapetritis bal kişand ser girîngiya parastina azadiya veguhastina deryayî û got ku Yewnanistan bi hevpeymanên xwe re amade ye hemû gavên pêwîst bavêje.

Li ser Balkanên Rojava jî wezîr behsa “Deklarasyona Delphi” kir û got ku ew ji bo zûtirkirina pêvajoya berfirehbûna Yekîtiya Ewropayê dixebitin. Gerapetritis diyar kir ku armanca wan ew e ku ev pêvajo di dema Serokatiya Doreyî ya Encumena AB ya ku Yewnanistan dê di nîvê duyem ê sala 2027’an de bigire de encamên konkret bide.

Gerapetritis her weha ragihand ku lêkolîna li ser amûra deryayî ya bêmirov ku di rojên dawî de li Deryaya Îyonê hate tesbîtkirin dewam dike. Wezîr got ku bûyer ji aliyê Serfermandariya Giştî ya Artêşa Yewnanistanê ve tê vekolîn û piştî qedandina xebatên teknîkî dê gavên diplomatik ên pêwîst werin avêtin.

Gerapetritis bal kişand ku Yewnanistan ê nehêle tengezariya leşkerî li Medîteraneyê belav bibe û got ku pevçûnên gengaz ên li herêmê ji bo ewlehiya deryayî, jîngehê û sivîlan xetereyên cidî diafirînin.