Kurdî News Agency

Bîst û pênc endamên Koalîsyona Azadiya Medyayê (Media Freedom Coalition), ji ber pêşketinên dawî yên li Rojhilata Navîn, derbarê ewlehiya rojnamevanan û gihîştina agahiyan de daxuyaniyeke hevpar weşandin.

Li gorî daxuyaniya hevpar a ku ji aliyê Wezareta Karên Derve ya Belçîkayê ve hate parvekirin, hate tekez kirin ku rojnamevaniya serbixwe di dema pevçûnan de ji bo civakên bandorlêbûyî, bi pêşkêşkirina agahiyên rast û di dema xwe de, girîngiyeke krîtîk heye. Herwiha hate gotin ku rojnamevan û xebatkarên medyayê di ragihandina pêşketinên li herêmên pevçûnan bo cîhanê de roleke bêdawî dilîzin.

Di daxuyaniya hevpar de ji ber mirin, destgîrkirin û girtina rojnamevanan li herêmê fikar hate nîşandan. Hate destnîşankirin ku ji 7ê Cotmeha 2023an vir ve di pevçûnên li Gazze û Lubnanê de gelek rojnamevan û xebatkarên medyayê jiyana xwe ji dest dane, û gihîştina rojnamevanan bo herêmên pevçûnan jî her ku diçe tê sînordarkirin.

Di daxuyaniyê de hate îdiakirin ku hikûmeta Îsraîlê zêdetirî du salan e nahêle rojnamevan bi awayekî serbixwe bikevin Gazze, Hamas jî bi tundûtûjî û zextê azadiya rojnamevanan a ragihandinê sînordar dike. Herwiha bal hate kişandin ser zextên li dijî rojnamevanan li Îranê û qutbûna gihîştina înternetê.

Endamên koalîsyonê her cure tundûtûjiya li dijî rojnamevanan, binesaziya medyayê, saziyên çapemeniyê û wesayîtên medyayê şermezar kirin û bang li rêzgirtina qanûna mirovahî ya navneteweyî û parastina rojnamevanan ligel sivîlan kirin.

Di daxuyaniyê de herwiha hate gotin ku hemû êrîşên li dijî rojnamevanan divê di çarçoveya qanûnên neteweyî û navneteweyî de bên lêkolînkirin û berpirsiyar divê hesab bidin.