Kurdî News Agency

Li gorî nûçeya CCTV, Projeya Hîdroelektrîkê ya Suki Kirar, ku di çarçoveya Korîdora Aborî ya Çîn-Pakistanê (CPEC) de hatiye pêkanîn, bi elektrîka paqij beşdarî pêdiviyên enerjiya Pakistanê dike û di heman demê de hevkariya teknîkî ya di navbera her du welatan de xurtir dike.

Avakirina projeya hîdroelektrîkê ya bi kapasîteya 884 megawat, ku li navçeya Mansehra ya eyaleta Khyber Pakhtunkhwa ya Pakistanê ye, di Çileya 2017an de dest pê kir. Proje di Îlona 2024an de ket xizmetê.

Projeya Hîdroelektrîkê ya Suki Kirar ji dema ketina xizmetê ve zêdetirî 2,8 milyar kîlowat-saet elektrîka paqij hilberandiye. Herwiha hate ragihandin ku proje salane nêzîkî 1,3 milyon ton komira standard teserûf dike û elektrîka ku tê hilberandin li tora neteweyî ya Pakistanê tê veguhestin.

Endezyarê payebilind ê projeyê Mubashir Hasan got: “Projeya me 884 megawat elektrîk hilberîne. Dema ku bikeve tora neteweyî, dê ne tenê ji bo eyaletên me, lê ji bo tevahiya welat jî bi feyde be.”

Proje ne tenê bi hilberîna elektrîkê, lê bi parvekirina zanîn û ezmûna teknîkî di navbera her du welatan de jî derdikeve pêş. Endezyarên Pakistanî û Çînî ji sêwirandin û avakirinê heta xebitandinê di qonaxên cuda de bi hev re dixebitin.

Projeya Suki Kirar ji bo endezyarên ciwan ên Pakistanî jî wekî qadeke girîng a perwerdehiyê tê nirxandin ku dikarin tê de bi teknolojiyên pêşketî ezmûna pratîkî bi dest bixin.

Endezyar Malik Muhannad Danal, ku di projeyê de dixebite, got dema ku dest bi kar kir nû mezûn bû û ji endezyarên Çînî û teknolojiyên ku tên bikaranîn ezmûnên girîng bi dest xistiye.

Danal got: “Dema ku hatim vir, min alavên herî nû û teknolojiyên herî baş dîtin. Ez bawer dikim ku Çînî xwe her tim bi teknolojiyên herî nû re nûjen dikin. Min gelek tişt hîn bûn û ji kesên herî baş ên li qadê gelek zanîn bi dest xist.”

Korîdora Aborî ya Çîn-Pakistanê, ku di sala 2013an de wekî yek ji projeyên sereke yên Înîsiyatîfa Kember û Rê dest pê kir, di salên borî de di warên cuda yên wekî santralên enerjiyê, binesaziya veguhastinê û veberhênanên benderan de pêşketin tomar kiriye.

Projeya Hîdroelektrîkê ya Suki Kirar jî di çarçoveya CPEC de wekî yek ji veberhênanên girîng derdikeve pêş ku binesaziya enerjiya Pakistanê xurt dike û hilberîna enerjiya nûjenbar zêde dike.