Kurdî News Agency

Serokê Fransa Emmanuel Macron di daxuyaniya xwe ya li ser hesabê xwe yê medyaya civakî de ragihand ku li Marsîlyayê bi şaredar, rêveberên herêmî, berpirsên prefekturê, esnaf, niştecihên bajêr û hêzên ewlekariya navxweyî re hevdîtin kiriye.

Macron diyar kir ku li gorî dersên ji bûyerên 17ê Cotmehê hatine derxistin, guhertinên pêwîst hatine kirin û roja şemiyê, 24ê Cotmehê, mafê xwepêşandanê hatiye parastin û asayişa giştî hatiye dabînkirin. Wî ji hêzên ewlekariyê û rêveberên herêmî ji ber xebatên wan spas kir û ragihand ku ji bo parastina aramiyê li bajêr tedbîrên ewlekariyê yên pêwîst dê bidomin.

Macron got ku ji bo avakirina hevsengiyê di navbera azadiya xwepêşandanê, ewlekariya niştecihên bajêr û ji nû ve destpêkirina çalakiyên aborî de, li derveyî navenda bajêr li ser diyarkirina rêyên daîmî yên xwepêşandanan tê xebitandin. Wî tekez kir ku pêşengiyên wan parastina aramiyê, ji nû ve vekirina karsaziyan û vegera jiyana rojane bo rewşa normal in.

Macron ragihand ku bi hevkariya rêveberiyên herêmî û sektora taybet, ji bo karsaziyên ku hatine talankirin an jî ji ber bûyeran neçar mane ku deriyên xwe bigirin, gelek tedbîrên piştgiriyê, di nav de fona alîkariyê, hatine sepandin. Wî got ku ji bo bilezkirina dayîna tezmînatê, alîkariya fînansmana siparişên nû û piştgirîkirina esnafên ku windahiyên dahatê dîtine, bi şîrketên sîgortayê û bankayan re tê xebitandin.

Macron diyar kir ku biha bûna jiyanê û fikarên xwendekarên dibistanên amadeyî û zanîngehan derbarê paşeroja wan de fikarên rewa ne û bersivên berbiçav dixwazin. Wî ragihand ku hikûmet dê di heman rojê de tedbîran eşkere bike. Lê wî tekez kir ku ev fikar nikarin tundûtûjiyê, talankirinê an jî êrîşên li dijî saziyên giştî rewa bikin.

Macron diyar kir ku şeş meh berî hilbijartinên serokatiyê, Fransa ji şûna çerxa tundûtûjiyê pêdivî bi nîqaşa demokratîk heye. Wî tekez kir ku divê nêrînên cuda bên derbirîn, pêşniyar bên nîqaşkirin û welatî bikaribin paşeroja xwe bi azadî hilbijêrin. Macron ragihand ku hikûmet dê berpirsiyariya xwe ya dabînkirina asayişa giştî, parastina hawîrdora nîqaşa demokratîk û domandina yekîtiya civakî bi cih bîne.