Kurdî News Agency

Wezîrê Karên Derve yê Ukraynayê Andrii Sybiha ragihand ku Rûsya di şevê de êrîşeke berfireh li ser Ukraynayê pêk aniye. Sybiha got ku di êrîşan de mûşekên balîstîk û hîpersonîk û dronên şer hatine bikaranîn.

Li gorî daxuyaniya Sybiha, di êrîşan de bender, depoyên genim, sazgehên enerjiyê û pîşesaziyê û binesaziyên din ên krîtîk hatin hedefgirtin. Sybiha êrîş wekî “terora dewletê” binav kir û îdia kir ku Serokê Rûsyayê Vladimir Putin nikare li qada şer encam bi dest bixe û ji ber vê yekê bajar û binesaziyên krîtîk hedef digire.

Sybiha diyar kir ku êrîşên li ser binesaziya genim, bender û rêyên deryayî ne tenê Ukraynayê, lê li seranserê cîhanê nêzîkî 400 milyon kesan jî bi awayekî neyînî bandor dikin. Wî got ku yek hektar erdê çandiniyê yê Ukraynayê di asteke cîhanî de hewcedariya xwarinê ya nêzîkî 18 kesan dabîn dike.

Sybiha ji bo domandina hinartina genim a Ukraynayê banga afirandina rêyên zêde, zêdekirina kotayan û peydakirina amûrên depokirina genim kir, herwiha ji bo parastina azadiya seyrûseferê li rêyên deryayî xwest ku hewldanên hevpar werin kirin.

Sybiha diyar kir ku berî zivistanê ji bo xurtkirina berxwedana enerjiyê ya welatê wî pakêtên zêde yên piştgiriyê pêwîst in.

Sybiha bal kişand ser girîngiya hemû piştgiriya ku ji Ukraynayê re tê dayîn, di nav de pergalên berevaniya hewayî, kapasîteya hilberînê, amûr, çavkanî û îthalata enerjiyê.

Sybiha got: “Em spasdarê hemû hevkarên xwe ne ku di vê dema dijwar de li kêleka me ne. Em ê bi hev re şerê Rûsyayê bi dawî bikin û aştiyê vegerînin Ewropayê.”