Kurdî News Agency

Parlamentoya Ewropayê diyar kir ku ji ber taybetmendiya gerdûnî û derbasî-sinoran a hawîrdora dîjîtal, ji bo parastina welatî û demokrasiyan li seranserê Yekîtiya Ewropayê hewceyê koordînasyonê heye.

Parlamento bi biryara ku di 7ê Tîrmehê de bi 447 dengên erê, 128 dengên na û 78 dengên bêalî hate pejirandin, xwest ku xwendewarîya medyayê û hînbûna dîjîtal wekî jêhatîbûnên bingehîn ji bo hemû welatiyan di tevahiya pêvajoya perwerdehiyê de û piştî wê jî bêne teşwîqkirin.

Parlamenteran got ku xwendewarîya medyayê û hînbûna dîjîtal dê bihêle ku welatî dezenformasyonê, manîpulasyon û destwerdana agahiyên biyanî, zorberiya sîber û formên din ên zirara serhêl nas bikin.

Di biryarê de hate gotin ku divê siyasetan bên pêşxistin da ku welatî fam bikin sêwirana platforman dikare çawa bandorê li têgihiştina wan a agahiyan bike. Herwiha divê bername alîkariya bikarhêneran bikin ku naveroka edîtoryal, bazirganî û sentetîk ji hev cuda bikin, teknîkên razîkirinê nas bikin û naveroka ku ji aliyê zekaya çêkirî ve hatiye hilberandin nas bikin.

Parlamenteran ji bo pêşxistina xwendewarîya medyayê li seranserê YEyê xwestin ku hevkariya di navbera saziyên giştî û taybet de bê zêdekirin. Herwiha bang kirin ku amûrên hînbûna dîjîtal ên di perwerdehiyê de tên bikaranîn ji bandorên bazirganî dûr bên girtin û hevkariya bi sektora taybet re li gorî berjewendiya giştî bê meşandin.

Parlamentoya Ewropayê herwiha di çarçoveya nirxandina Rêbernameya Xizmetên Medyaya Dîtbar û Bihîstbar de xwest ku ji bo parastina zarokên ku platformên parvekirina vîdyoyan bi kar tînin tedbîrên zêde bên girtin. Ji ber rola wan di teşekulkirina adetên xortan ên xerckirina agahiyan de, hate xwestin ku influencer û çêkerên naverokê jî bikevin bin rêzikên naveroka medyayê û kodên tevgerê û rêbernameyên zelal bên amadekirin.

Raportorê biryarê Marcos Ros Sempere got ku demokrasî divê welatiyan neçar nekin ku bi tena serê xwe li dijî dezenformasyonê, sêwiranên ku girêdayîbûnê çêdikin û berjewendiyên bazirganî yên platformên mezin têbikoşin, û tekez kir ku xwendewarîya medyayê û hînbûna dîjîtal divê ji bo welatiyên hemû temenan bibin jêhatîbûnên bingehîn.