Kurdî News Agency

Qeter beşdarî konferansa navneteweyî ya bi navê “Mîrasa Çandî ya Îslamî li Ozbekistanê û Rola Wê di Zanista Cîhanî de” bû ku di navbera 7 û 9ê Îlonê de li paytexta Ozbekistanê Taşkentê tê lidarxistin.

Li gorî daxuyaniya Wezareta Karên Derve ya Qeterê, konferans bi armanca pêşxistina lêkolînên rojhilatnasî û çandî bi rêya têkiliya zanistî û çandî û xurtkirina diyaloga navbera şaristanî û çandan hat lidarxistin.

Serokatiya heyeta Qeterê ji aliyê Sekreterê Giştî yê Wezareta Karên Derve û Serokê Komîteya Qeterê ya Hevbendiya Şaristaniyan Ahmed bin Hassan Al Hammadi ve hate kirin. Digel Qeterê, akademîsyen, pispor û lêkolînerên ji Tirkiye, Îtalya, Urdun, Iraq, Cezayîr, Misir û Fasê jî beşdarî konferansê bûn.

Al Hammadi di axaftina xwe ya li konferansê de got ku çalakî di çarçoveya Bernameya Dîplomasiya Çandî de tê lidarxistin ku di plana Qeterê ya Hevbendiya Şaristaniyan a 2023–2027 de hatiye destnîşankirin.

Al Hammadi got ku bername armanc dike bajarên Îslamî yên ku di pêşketina zanist û çandê ya li seranserê cîhanê de roleke çalak lîstine bide nasîn û diyar kir ku konferans encama hevkariya zanistî û hevpariya di navbera Komîteya Qeterê ya Hevbendiya Şaristaniyan, Zanîngeha Qeterê û Zanîngeha Dewletê ya Lêkolînên Rojhilatî ya Taşkentê de ye.

Al Hammadi ragihand ku di çarçoveya konferansê de mîrasa zanistî ya ku alimên wekî Xwarizmî, Bîrûnî, Îbn Sîna û Îmam Buxarî hiştine û bandora vê mîrasê li ser pêşketina zanista cîhanî di warên matematîk, endezyarî, cebr, zanistên erdê, kîmya, bijîjkî, felsefe û lêkolînên Îslamî de tê nirxandin.

Al Hammadi destnîşan kir ku dîplomasiya çandî piştgirî dide diyalog û hevkariya navbera şaristaniyan, nêzîkbûna gelan û xurtkirina mîrasa çandî ya hevpar û got ku çalakiyên bi vî rengî di warên cuda de derfetên nû yên hevkariyê di navbera welatan de diafirînin.

Al Hammadi diyar kir ku di salên dawî de di navbera Qeter û Ozbekistanê de tevgera çandî ya girîng çêbûye û bi bîr xist ku di Sibata 2024an de li Dohayê Hefteya Çanda Ozbekî û di Cotmeha 2024an de li Taşkentê Hefteya Çanda Qeterê hat lidarxistin.

Al Hammadi her wiha destnîşan kir ku Qeter bi awayekî berfireh beşdarî vekirina Navenda Şaristaniya Îslamî ya li Ozbekistanê bû û got ku navend yek ji projeyên girîng ên çandî û zanistî ye ku armanc dike beşdariya şaristaniya Îslamî û alimên herêmê di pêşketina mirovahiyê de nîşan bide, mîrasa destnivîsan biparêze û lêkolînên zanistî û diyaloga navbera şaristaniyan teşwîq bike.

Al Hammadi hêvî kir ku konferans pêşniyar û şîretên zanistî derxe holê ku dê alîkar bin mîrasa çandî ya Îslamî ya Ozbekistanê û beşdariya vê mîrasê di pêşketinên zanistî yên cîhana îroyîn de were eşkerekirin.